Ngein suzi pukma 19 hte tara jawat hkrum ai ramma marai 2 kaw na Shayi Seng Nu Pan hpe tara rung kaw jep joi
Hpyen yen mungshawa ni hkamsha ai lam hpe Street Performance lamang hpe woi awn galaw ai ramma marai 2 kaw na Shayi Seng Nu Pan hpe July shata 25 ya jahpawt hkying 10:00am aten kaw nna hkying 1:30pm aten du hkra Myitkyina tara rung kaw amu jep joi ai lam chye lu ai.
Upadi tara agyi wa kaw nna san jep ai hta hpa ni galaw lai wa ai, hpa majaw ndai kaw jep ai lam hte lamang hpe galaw na shaloi Balik dap kaw laika mara ai kun n mara ai kun ngu ai lawng lam ni hpe san jep ai re lam, Shayi Seng Nu Pan tsun ai.
Myen Mung Asuya kaw nna hpyen yen mungshawa ni hpe tinang a buga dum nta de bai wa na matu policy galaw taw nga ai aten hta hpyen yen mungshawa ni hkrum sha wa ai mayak manghkang ni hpe Street Performance hkrang shala madun dan ai, ndai zawn galaw dan ai hpe tara jawat ahkyak la ai ngu gaw, Democracy Asuya nga tsun taw timung grai nhtap htuk, grai nhkrak ai ladat re. Nga nna Shayi Seng Nu Pan matut tsun ai.
July 18 ya shani hta gaw Shadang Pawlu hpe san jep ai lam ni galaw sai re. Dai ni gaw 7 lang ngu na tara rung dung ai rai nna, du wa na August shata praw 1 ya shani hta gaw Shadang Pawlu hte Shayi Seng Nu Pan yan maga na sakse masha ni hpe bai jep san na re lam chye lu ai.
Tara jawat hkrum ai ramma yan gaw lai wa sai June shata praw 9 ya shani hta Myitkyina Muklum kaw Street Performance lamang galaw ai hta masha gahkyin gumdin ai ngu nna, Myen Balik Du Min Thant Zaw hku nna ngein suzi pukma 19 hte tara jawat da ai re.
