Ningbaw Kaba Nban La Hkristan dinghku de 45 ning hpring hte Magam Gun ladaw 55 ning hpring chyeju shakawn akyuhpyi hpawng galaw
Wunpawng Mungdan Shanglawt Kongsi Ningbaw Kaba Du Daju Jum Nban La hte Jan. Nangzing Kaw Hpang (Ningbaw, Wunpawng Mungdan Shanglawt Amyu Shayi Hpung Ginjaw) yan a Hkristan dinghku de 45 ning hpring hte Magam Gun ladaw 55 ning hpring chyeju shakawn akyuhpyi hpawng hpe August shata praw 4 ya shana daw 2:00pm aten hta Laiza Muklum Ningbaw Kaba a rung dum nta kaw galaw ai lam chye lu ai.
Ningbaw Kaba kaw nna Mungdan magam gun let Hkristan dinghku de wa ai lam, shinggyim masha re majaw Karai a man Masha a man hta tsun shut shaga shut ai mara ni hpe hpyi nyem tawngban sakse hkam ai lam, Karai Kasang hpe chyeju dum chyeju shakawn ai hte akyuhpyi ra ai lam hpe tsun ai.
Nawku hpung woi sara ni kaw nna, Ningbaw Kaba a dum nta masha ni hte du sa ai makyin jinghku jingyu ni yawng a matu Karai Kasang kaw akyuhpyi shaman ya ai.
Chyeju shakawn akyuhpyi hpawng hta nawku hpung a Kanu Kawa makyin jinghku ni, Ginjaw Komiti Salang ni hte Magam Dap, Makan Dap na myitsu salang ni sa du shanglawm ai lam chye lu ai.
