Ninggawn Daju ni woi awn nna, ginlung hkristmas akyu hpyi hpawng galaw

Laiza Muklum Sinpraw Majoi Manau Wang hta KIO Ninggawn Daju ni woi awn nna, December 27 ya jahpawt hkying 8:30am aten hkristmas ginlung akyu hpyi hpawng galaw ai lam chye lu ai.

Ginlung hkristmas galaw ai a yaw shada lam hpe KIO Tingnyang Up Malai Du Kaba Nban La tsun ai hta “Dai ni gaw anhte magam gun nga ai hpung, Karai Kasang hpe kamsham ai hpung shagu a malai ginlung nna galaw ai hkristmas poi rai nga mali ai. Ndai poi galaw ai a jaw e, shatan nhkan byin nga ai hpung hte hpung, grau nna shada chye na hkat ai hte magyep kap wa lu na matu galaw ai re” nga nna tsun ai.

Hpung woi sara ni kaw nna mung, hpyen magam gun nga ai ni hte mungchying mungshawa ni galaw shut kau sai yubak mara ni hpe Karai Kasang kaw hpyi nyem tawngban ya ai lam, matut nna shawnglam hta galaw sa wa na Ginjaw Komiti a mungmasa hpyenmasa lam awng dang na matu hte mungchying shawa yawng a matu akyu hpyi ai lam galaw ai.

Ginlung hkristmas akyu hpyi hpawng hta dap shawa, mungchying shawa yawng marai 700 daram sa du shanglawm ai hpe chye lu ai.