Ninggawn Daju Pati Komiti Salang ni hkrumzup bawngban hpawng galaw

KIO Hpung Pati hte seng ai hkaja lam hte rung bungli hte seng nna Ninggawn Daju Pati Komiti salang ni a hkrumzup bawngban hpawng hpaw lamang hpe August shata 28 ya jahpawt hkying 9:00am aten hta Laiza Muklum Padang Rung, Ninggawn Daju Pati Komiti Rung kaw galaw ai lam chye lu ai.

Hpawng hta Ninggawn Daju Pati Komiti Amu Madu Du Up Yajawng Dai Hkawng kaw nna hpawng a yaw shada lam, Rung hkri dun lam hte matut nna galaw sa wa na shawng lam magam bungli ni hpe bawngban sa wa re lam tsun ai hta, “Daini anhte hpung pati hte seng nna Wunpawng Mungdan Shanglawt Hpung hpe greng grak ngangkang nna masan sa awngdang ai mungmasa hpung byin tai wa lu hkra ngu yaw shada let galaw ai re” nga nna tsun ai.

Ninggawn Daju Pati Komiti Shingtau Tingnyang Up (II) Du Up Jum Lahpai Hing Wawm kaw nna mung, Wunpawng Mungdan Shanglawt Hpung greng grak wa na matu gaw Hpung shang pati magam gun ni hte pati hte seng nna tatut lit la ai ni gaw tatut hkrang shapru ra na re, Komiti shamu shamawt bungli galaw sa wa ai hta rawt jat wa hkra zinlum ai bungli hpe ja ja galaw ra na re lam tsun ai.

Hpawng hta Ninggawn Daju Pati Komiti Amu Madu, Ningtau Amu Madu hte Rung Up ni, KIO Hpung Pati hte seng ai salang ni shang lawm let bawngban ai rai nna, bawngban hpawng hpe August shata 29 ya shani du hkra galaw sa wa na re lam chye lu ai.

Photo Credit; Mai Mai Seng Lahpai