Ninggawn mungmasa mahkawn shalat ginchyum dat hpawng galaw
Ninggawn mungmasa mahkawn shalat ginchyum dat hpawng hpe Ninggawn Mungmasa sharin achyin shabyin shatai komiti kaw nna woi awn ai hte Laiza Lahta Tsang Jawng Gawknu kaw July shata 31 ya shanni hkying 2:00pm aten hta galaw la lu sai re.
Hpawng lamang hta Ningtau Ninggawn Amu Madu Salang Kaba Labang Doi Pyi Sa kaw nna shatsam mungga shaga ai rai nna, Ginjaw Hpaji Dap Amu Madu Sara kaba Marip Naw Htoi kaw nna bungli lam sanglang dan ai hte chyeju dum ga tsun ai re.
Ninggawn mungmasa mahkawn shalat ai hta shang lawm ai yu ngwi shayi shadang sha ni hte yu ngwi nsen hpe shalat ya ai mahkawn ka sara ni hpe mung komiti kaw nna masat masa kumhpa shagrau ai lam galaw ai re.
Ninggawn mungmasa mahkawn shalat ai lam hpe 2020 ning February shata kaw nna galaw hpang ai rai nna, ninggawn mungmasa mahkawn hpe yu ngwi hpan hkum hte buk 32 gin shalat la lu sai lam chye lu ai.
Ndai mahkawn hpe KIO uphkang ginra kata na shanglawt asuya hpaji jawng ni hta jai lang lu na matu hte tsang 6 lawu daw na jawngma ni hpe madung sharin ya na re lam chye lu ai.
“Ninggawn mungmasa gaw mungmasa hte seng ai ga si ga ngau ni, mungmasa ga ni hkum tsup hkra lawm ai re, tsang kaba ai hpang she sharin yang grai tang du ai lam nmu mada ai, ninggawn mungmasa gaw myusha ni yawng nchye nmai, yawng hkan nang ra ai chye nan chye da ra ai, anhte a lam woi ning shawng mungmasa laika buk re majaw, ya kaba wa ai ma ni ramma ten rai yang hkut hkut nai nai chye na matu, kaji ten kaw na dawk bang ya ra ai ngu yaw shada ai let galaw hpang wa ai re” nga nna Ninggawn Mungmasa Sharin Achyin Shabyin Shatai Komiti Amu Madu Sara Kaba Tangbau Zau Awn tsun ai.
Laiwa sai 1971 grup yin hta Dingdung Ginwang Ginjaw Masat (1) Dapba kaw Div-O galaw ai Du Kaba Shawng Htoi kaw nna ka shalat da ai ninggawn mungmasa ga shagawp hpe yu ngwi hta chye chyang ai mahkawn ka shalat ai sara ni hpe music nsi note bang shangun ai re hpe chye lu ai.
Shalat la lu sai ninggawn mungmasa mahkawn ni hpe Ginjaw Hpaji Dap kaw nna lam masan galaw ya nhtawm, 2020 hpaji ladaw kaw nna sharin sa wa na re lam, Muklum mare kaba de hpaw tawn ai amyusha jawng ni, sasana jawng ni hta mung sharin mai ai ahkaw ahkang ntsa tsang kaw nna ahkang jaw ai hta hkan nna sharin sa wa na re lam chye lu ai.
Hpawng lamang hta komiti kaw nna saw shaga da ai myitsu kanu kawa ni, ninggawn mungmasa mahkawn shalat ai hta shang lawm ai yu ngwi shayi shadang sha ni hte mahkawn ka sara ni sa du shanglawm ai lam chye lu ai.
