Njang Yang hpaji jawng ni hta du wa na hpaji ladaw kaw nna, KIO hpaji sharin ladat hte sharin sa wa na
Myitkyina Ginwang, Njang Yang kata nga ai, hpaji jawng ni hta bai du wa na hpaji ladaw kaw nna, KIO hpaji sharin ladat hte sharin sa wa na lam chye lu ai.
Njang Yang mare kata nga ai Njang Yang lahta tsang jawng, Nlawk Yang jawng hte Ngreng Kawng jawng ni hta bai du wa na hpaji ladaw kaw nna, KIO hpaji sharin ladat hte bai sharin sa wa na lam, ginra masha ni kaw na chye lu ai.
Lai wa sai 2023 ning November shata 20 ya shani Njang Yang kata dap jung nga ai, gumshem Myen hpyen dap (2) hte Myen balik dap na magam gun ni yawng wa mat ai majaw, hpaji jawng ni hta ap nawng nga ai jawng sara/num ni mung yawng wa mat ai rai nna, jawng shata mi pat kau ra ai lam, ginra masha ni matut tsun ai.
Jawng sara/num ni yawng wa mat ai majaw, jawng pat mat wa ra ai masa nga ai, dai majaw jawng bai lu hpaw na matu dai ginra na hpung woi sara ni hte lit nga ai salang ni, gumshem Myen hpyen dap shatsam da ai, Jinghpaw Mung Hkring Mang Daju, Salang. Hkyet Hting Nan hpe sa jahkrup ai lam ni nga ai hpe chye lu ai.
Ndai zawn sa jahkrup ai lam ni nga ai majaw, shata mi na ai hpang jawng sara/num ni bai du wa nna, jawng bai matut hpaw nga ai hte du wa na hpaji ladaw kaw nna gaw, KIO hpaji sharin ladat hte matut sharin mat wa na lam chye lu ai.
Njang Yang kata jawng lung nga ai jawngma yawng marai 300 daram nga ai hta 2023 ning November shata 20 ya shani kaw nna jawng shata mi pat kau ai hpang, December shata 20 ya shani kaw na she bai hpaw hpang sharin nga ai hta jawng sara/num nkau bai du wa ai lam nnga shi ai hpe chye lu ai.
