Njang Yang kaw mu gun ai jawng sara saranum ni wa mat ai majaw, jawngma ni jawng lung na matu yakhkak nga
Myitkyina Ginwang, Njang Yang kata nga ai jawng ni hta apnawng nga ai, jawng sara saranum ni wa mat nna, jawng 3 pat kau ai majaw, jawngma ni jawng bai matut lung na matu yakhkak nga ai lam chye lu ai.
Njang Yang kata dap jung shara jahkrat nga ai, gumshem Myen hpyen dap lahkawng hte gumshem Myen balik dap ni November shata 20 ya shani yawng hting nut koi yen mat wa ai a majaw, jawng sara saranum ni mung bai wa mat ai hta, Njang Yang lahta tsang jawng, Nlawk Yang lapran tsang jawng hte Ngreng Kawng lawu tsang jawng ni pat kau ra ai re lam, ginra masha ni tsun wa ai kaw na chye lu ai.
Dai jawng ni hta jawngma yawng marai 300 daram jawng lung nga ai rai nna, November shata 20 jan kaw na pat kau ai, dai ni du hkra re lam ginra masha matut tsun ai.
Ndai jawng ni hpe bai hpaw lu na matu, Njang Yang kata nga ai seng ang ai hpung woi kanu kawa ni hte mare salang ni hku nna, gumshem Myen hpyen dap ni shatsam da ai, Jinghpaw Mung Hkringmang daju, Salang. Hkyet Hting Nan hpe wa bawngban jahkrup ai lam ni galaw ai raitim, dai ni du hkra lam masan ya ai lam nnga ai hpe chye lu ai.
Jawngma kanu kawa ni hku nna, KIO, KIA ni hpaw da ai jawng ni hta bai matut wa lung shangun na matu mung, hpyen masa a majaw hkrunlam yakhkak nga ai re hpe matut chye lu ai.
