Njang Yang mare kaw CCRC-K ni sa du garum

COVID-19 Concern and Response Committee-Kachin (CCRC-K) kaw nna, October shata praw 1 ya shani Njang Yang mare de malu masha hte arung arai sa du garum ai lam chye lu ai.

Ya na zawn sa du garum ai hte seng nna, CCRC-K a tsun ahkang nga ai Salang Nhkum Tang Gun tsun ai hta “COVID-19 ana a majaw mungshawa ni a galaw lu, galaw sha yak hkak ai lam ni law law byin nga ai majaw sa du garum ai lam re” nga tsun dan ai.

Garum jaw ai lam hta COVID-19 ana ninghkap makawp maga arung arai hte seng ai, n-gup ladi magap, lata gashin ntsin, thermometer, lata laraw, n-gu hte sau ni sa du garum jaw ai lam chye lu ai.

Ndai garum arung arai hpe Njang Yang mare Komiti kanu kawa ni hpe garum jaw da sai rai nna, mare komiti kawn garum jaw ra ai yak hkak ai dinghku ni hpe matut lit la garum jaw sa wa na re hpe salang wa tsun ai.

Ya na zawn garum arung arai ni hpe, Kachinland Research Center (KRC) hte Kachin Women’s Association of Thailand (KWAT) kaw nna lam tam garum jaw la ai re hpe mung chye lu ai.

COVID-19 aten ladaw hta matut nna mung, ginra komiti ni hpe hpaw jat mat wa let, yak hkak ai shara ginra ni hta hkan nna, garum sa wa na re hpe mung chye lu ai.