Nmawk ginra gasat gala majan laja lana matut byin nga

Manmaw, Nmawk ginra hta KIA hte gumshem Myen hpyen dap ni gasat gala majan laja lana matut byin nga ai lam chye lu ai.

November shata praw 4 ya shani kaw nna, KIA ni shara la nga ai Awng Mye mare maga de gumshem Myen hpyen dap ni numdaw kalang bai htu shadut lung wa ai majaw, gasat gala majan laja lana matut byin nga ai lam, lit nga ai salang ni kaw na chye lu ai.

KIA ni shara la nga ai maga de gumshem Myen hpyen dap ni laknak kaba hpan hkum gap bun nna, hpri gang modo ni hte bai htu shadut lung wa ai majaw, gasat gala majan laja lana byin nga ai lam chye lu ai.

Gasat gala majan byin nga ai shara de gumshem Myen hpyen dap ni gaw Drone, Jet nbungli ni hte bawm jahkrat gasat nga ai sha n-ga, Manmaw kaw dap jung nga ai, gumshem Myen hpyen dap ni gasat gala majan byin nga ai shara de hpyen n-gun jat bang nga ding yang re ai majaw, gasat gala majan matut manoi byin wa mai ai lam, matut chye lu ai.