Nmawk ginra gasat gala majan matut byin nga

KIA Masat (3) Dap Ba, Nmawk ginra hta KIA hte gumshem Myen hpyen dap lapran gasat gala majan matut byin nga ai lam chye lu ai.

Nmawk kaw dap jung shara la nga ai gumshem Myen hpyen Hk.L.Y (437) dap hte KIA pawng hpawm hpyen hpung ni August shata praw 6 ya shani du hkra, matut manoi gasat gala majan naw byin nga ai lam, lit nga ai salang ni kaw na chye lu ai.

Hk.L.Y (437) gumshem Myen hpyen dap hpe KIA pawng hpawm hpyen hpung ni laiwa sai July shata 24 ya shani kaw nna, kalang bai matut htim gasat nga ai re.

Gasat gala majan byin nga ai hta gumshem Myen hpyen dap kaw nna mung, Hk.L.Y (437) dap hpe ntat sum hkra, nbungli bawm, laknak kaba ni hte laja lana gap garum ya nga ai re lam chye lu ai.

Ya aten Nmawk, Manje ginra ni hta KIA hte gumshem Myen hpyen dap ni, gasat gala majan matut manoi naw byin nga ai majaw, dai ginra hkan na mungshawa ni hpyen koi yen hkawm nga ra ai re hpe chye lu ai.