Nmawk ginra gasat gala majan matut byin nga
Manmaw, Nmawk ginra hta KIA hte gumshem Myen hpyen dap ni gasat gala majan matut byin nga ai lam chye lu ai.
October shata 20 ya shani hte 21 ya shani hta Nmawk Deng (7) ginra de gumshem Myen hpyen dap ni, nbungli drone laknak kaba ni hte gap garum nna, hpri gang mado ni hte hpyen n-gun bai htu shadut lung wa ai majaw, KIA hte gasat gala majan matut byin nga ai lam, lit nga ai salang ni kaw na chye lu ai.
Hpyen n-gun bai htu shadut lung wa ai hta KIA pawng hpawm hpyen hpung kaw nna mung, laja lana shingla gasat ai majaw, gumshem Myen hpyen dap ni bai hting nut mat ai re lam chye lu ai.
Laiwa sai August shata 19 ya shani, Nmawk Hk.M.Y (437) dap hpe KIA pawng hpawm hpyen hpung ni gasat zing la lu ai hpang, August shata 24 ya shani kaw nna, gumshem Myen hpyen dap kawn Nmawk ginra bai lu la na matu, hpyen n-gun htu shadut shamu shamawt ai lam ni galaw nga ai re hpe chye lu ai.
