Nmawk ginra hta gasat gala majan matut byin
KIA Masat (3) Dap Ba, Nmawk ginra hta KIA hte gumshem Myen hpyen dap ni gasat gala majan matut byin nga ai lam chye lu ai.
July shata 24 ya shani kaw nna, Nmawk gumshem Myen hpyen Hk.M.Y (437) dap shara hta KIA hte gumshem Myen hpyen dap ni gasat gala majan laja lana bai byin nga ai lam, lit nga ai salang ni kaw na chye lu ai.
Gasat gala majan byin nga ai hta phone internet line nlu ai majaw, lahkawng maga na hpyen masa lam gara hku naw byin nga ai hpe atsawm hkrak nchye lu shi ai re.
Laiwa sai July shata 15 ya shani hta mung, Manmaw kawn Nmawk ginra de hpyen n-gun htu shadut shamu shamawt sa wa ai gumshem Myen hpyen dap hte KIA ni gasat gala majan laja lana byin lai wa sai re.
Ya aten Nmawk hte Manje ginra ni hta KIA hte gumshem Myen hpyen dap lapran hpyen masa shaja hkan nga ding yang rai nna, gasat gala majan mung byin nga ai lam chye lu ai.
