Nmawk hpyen man de, gumshem Myen hpyen ni nbungli bawm matut jahkrat bun
Nmawk hpyen man de, gumshem Myen hpyen ni September shata 17 ya jahpawt hkying 3:00am aten daram hta nbungli bawm 2 lang sa jahkrat bun ai lam, shawng lam shiga lawk kaw na chye lu ai.
Nmawk gumshem Myen hpyen dap, Hk.M.Y (437) dap hpe August shata 19 ya shani hta KIA pawng hpawm hpyen hpung ni htim gasat zing madu la ai 3 ya na ai hpang, gumshem Myen hpyen ni gaw, hpyen n-gun law law hte bai htu shadut lung wa ai majaw, hpyen masa shaja hkat nga ai n-ga shani shagu ngu na gasat gala majan byin nga ai re.
Shwegu na Manmaw maga de bai shamu shamawt lung wa ai Myen hpyen sanghpaw 5 hpung ni hpe September shata 17 ya jahpawt hkying 9:00am aten daram kaw nna, KIA pawng hpawm hpyen hpung ni Shwegu lahta kaw hkap gap gasat ai hta sanghpaw 2 hpe gap hkra ai majaw, Shwegu de bai nhtang yu mat wa ai lam, ginra shiga lawk kaw na chye lu ai.
Ndai sanghpaw hpung ni lung wa ai hka lam ding yang, gumshem Myen hpyen ni nbungli hte shimlam la ya nhtawm, shanhte ntsen nhten ai shara de, jak sinat gap bun, bawm ni jahkrat bun ai lam galaw nga ai re.
Hpakant Seng Tawng mare Lacky Men Hotel kaw chyat rawng nga ai bungli galaw mungshawa ni hpe September shata 17 ya shani hta KIA pawng hpawm hpyen hpung ni hkye shalawt la lu sai lam, ginra masha ni kaw na chye lu ai.
Dai na maga hkying 5:30pm aten daram hta mung, Yuma mare kaw gumshem Myen hpyen ni hte KIA pawng hpawm hpyen hpung ni gasat poi byin ai rai nna, Hpakant Tatma kawng kaw nna Seng Tawng maga de laknak kaba gap bun ai lam, shawng lam na lit nga salang ni kaw na chye lu ai.
September shata 16 ya shani hta mung, Hpakant Tatma kawng kaw na laknak kaba hkrup mara gap shadam dat ai majaw, Hpakant Ngapyaw daw kaw wa hkrat kapaw ai majaw, mungshawa marai 2 asak si sum nna, marai 5 hkala hkrum lai wa sai re.
