Nmawk hpyen man maga de, gumshem Myen hpyen ni nbungli bawm matut jahkrat
Nmawk hpyen man maga de, KIA pawng hpawm hpyen hpung ni hte gumshem Myen hpyen ni hpyen masa shaja hkrat nga ding yang re hta September shata praw 10 ya jahpawt hkying 5:00am aten daram hta nbungli bawm 2 lang wa jahkrat bun ai lam chye lu ai.
Nmawk gumshem Myen hpyen dap, Hk.M.Y (437) dap hpe August shata 19 ya shani KIA pawng hpawm hpyen hpung ni gasat zing madu la ai 3 ya na ai hpang Myen hpyen maga hpyen n-gun tsa lam hte bai htim gasat wa ai sha n-ga, nbungli drone ni hte bawm jahkrat gasat nga ai re.
Ya aten Nmawk hpyen man rai nga ai, Manmaw Deng 5,6,7 hte Manje makau Kawng Ja Yang hpyen man maga, KIA pawng hpawm hpyen hpung ni hte gumshem Myen hpyen ni hpyen masa shaja hkrat nga ding yang re lam, shawng lam na lit nga ai salang ni kaw na chye lu ai.
KIA Masat (9) Dap Ba, Masat (6) Dap Dung ginra, Hpakant Seng Tawng mare kaw nga ai gumshem Myen hpyen dap hpe September shata praw 10 ya shani hta mung KIA pawng hpawm hpyen hpung ni gasat nga ding yang re lam chye lu ai.
Shani hkying 11:50am aten daram hta Hpakant Dapnu Kawng kaw nna, Seng Tawng mare maga de gumshem Myen hpyen ni laknak kaba hkrup mara gap shadam dat ai majaw, mungshawa marai 4 hkra hkala hkrum ai lam, ginra masha ni kaw na chye lu ai.
Sinat kaba pala si hkra hkala ai mungshawa masha ni gaw, Sabaw mare na marai 2 hte Seng Tawng Ngwi Pyaw Lawk na marai 2 yawng marai 4 re lam chye lu ai.
September shata praw 9 ya shani hta mung, Chyauk Dwi Taung maga de na shamu shamawt sa wa Myen hpyen ni, Seng Tawng mare Lucky Man Hotel shara ni hta nga ai Myen hpyen ni hte KIA pawng hpawm hpyen hpung ni gasat poi byin ai re.
Hpakant Seng Tawng mare makau Yu Ma mare kaw September shata 4 ya shani kaw nna, gumshem Myen hpyen hte KIA pawng hpawm hpyen hpung ni gasat poi byin wa ai majaw, ya aten hta mungshawa nkau gaw tinang shim lum dum ai shara de hprawng koi yen nga ai lam na chye lu ai.
