No.1 lang na Laili Laika Hte Myusha Shawnglam ngu ai ga baw hte hkaw tsun hpawng galaw
Laiza Muklum, Sinpraw Majoi Manau Gawknu kaw No.1 lang na Laili Laika Hte Myusha Shawnglam ngu ai ga baw hte Ningshawng Laika Dum kaw nna woi awn nhtawm, February shata 23 ya jahpawt hkring 9:00am aten kaw nna shani ka-ang hkying 12:10pm aten du hkra, hkaw tsun hpawng galaw ai hpe chye lu ai.
Hpawng hta Sara Kaba Marip Naw Htoi ( Ginjaw Hpaji Dap Amu Madu ) kaw nna shatsam mungga shaga ai. Sara Kaba Kareng Bawm Awn ( Nang Shayi, Ningka Sara ) kaw nna, hkaw tsun hpaji jaw ai lam galaw ai.
Sara Nbrang Myu San hku nna mung, gawda ai tara masa lam Laws Letter and Options ni hpe sanglang dan ai. Kachin Review laika hte seng nna Sara Lapyaw Hkawng Ze sanglang shachyen ya ai. Dai hpang Hparat Panglai Journal hte seng nna, Saranum Sumlut Bawk Hkawn ( Htunghking hte Laili Laika Magam Dap ) kaw na sanglang shachyen ya ai lam galaw ai re.
Ndai hkaw tsun hpawng lamang hte seng nna yaw shada ai lam hpe Sara Lapyaw Hkawng Ze ( Ningshawng Laika Dum. Ginjaw Tara Rung ) kaw nna ya na zawn tsun ai.
“Anhte a mare kahtawng buga masha nga sat nga sa madang tsaw wa lu na matu myit sawn hpaji machye machyang ni suhprang wa na matu, ndai laika hti ai a marang e, machye machyang suhprang wa jang anhte a wuhpung wuhpawng ganawn mazum ai lam gaw prinem wa na, dai hpe yaw shada let galaw ai re”
Laili laika hkaw tsun hpawng hta Magam Dap, Makan Dap na magam gun ni, Jawng Sara/num ni hte Jawngma ni yawng marai 695 tup sa du shang lawm ai re hpe chye lu ai.
