No. (2) lang na laili laika hkaw tsun hpawng galaw
Laiza Muklum Sinpraw Majoi Gawknu kaw, November shata 23 ya jahpawt hkying 9:00am aten hta “Laili laika hte shawnglam pandung” ngu ai ga baw kata hta No. (2) lang na laili laika hkaw tsun hpawng galaw ai lam chye lu ai.
Ndai hpawng lamang hpe Ningshawng Laika Dum (NSLD) kaw nna woi awn lit la galaw ai rai nna, yaw shada lam hpe Sara Lapyaw Hkawng Ze (NSLD) kawn ya na zawn tsun ai.
“Ndai zawn re ningmu jahpaw ni galaw dat ai a marang e, lu la wa ai akyu ni gaw tinang a myit hpe wang lu wang lang tawn da na, tinang galaw ai magam bungli hta grau nna ngangkang ai, machye machyang tsun shaga lam hta ndut ndang lu tsun shaga wa lu na matu gaw laika hti ra ai, laika hti jang she makau grup yin wuhpung wuhpawng hte kanawn mazum tsun shaga lam hta raitim mung, grau nna ngangkang ai, hku hkau ai lam hta shada da gamung dup, jahta ai lam grau nga wa na re” nga nna tsun ai.
Hpawng lamang langai mi hkyen dat na matu nloi la ai, ndai zawn re hpawng lamang langai byin tai wa na matu garum shingtau na kadai mung nnga ai. tinang hkrai dep hkap ai daram she woi galaw taw ai re majaw, la ma na shawa masha yawng ndai hpe hkrak ai nga nna, garum shingtau madi shadaw la ai rai yang gaw, matut galaw sa wa na masing nga ai. Dai shaloi gaw ga baw langai sha nre ramma hte seng ai lam, Htunghking hte seng ai lam ga baw langai hte langai jashai nna galaw sa wa na re, nga nna Sara matut tsun ai.
Hkaw tsun hpaji jaw ai Sara gaw, Sara Kaba Lahtaw Dan Seng Lawn hte Fr. John Galang La Raw yan re. Lamang hta laika buk shachyen ai lam, kumhpa shagrau ai lamang ni galaw ai rai nna, Salang Kaba Chyana Zau Awn (Htunghking Hte Laili Laika Magam Dap Lithkam) kaw nna shatsam mungga shaga ai.
Nambat (1) lang na laili laika hkaw tsun hpawng lamang hpe ndai Sinpraw Majoi Gawknu hta sha, 2019 ning February shata 23 ya shani galaw ai rai nna, hkaw tsun hpawng hpe numdaw 4 lang galaw sai raitim, ya na zawn shawa daw tsa, bungba batba hte galaw ai gaw nambat (2) lang re hpe chye lu ai.
Hpawng lamang hta mungshawa kanu kawa ramma ni hte magam dap, makan dap na Salang ni yawng marai 300 daram sa du shanglawm ai hte angw apyaw galaw la lu sai re hpe chye lu ai.
