Nsang Awng La gaw shajup manat ai hpaji hte Alain Ngalani hpe awng padang lu

Yangon Muklum kaw November praw 3 ya shana galaw ai One Championship MMA ginsup poi hta mungkan a Middle weith Champion ninghkring langai rai nga ai Nsang Awng La gaw shajup manat hpaji hte Heavy Weith Champion ninghkring Alain Ngalani hpe minuts 4 jan hte dang la lu sai.

Nsang Awng La gaw shingjawng poi ndu shi yang, shi sanglang hpawng hta tsun da ai gaw, Alain Ngalani hpe 2 Round hta dang hkra ginsup na ngu tsun da ai raitim, ginsup mat wa ai shaloi 1 Round hta minutes 4 jan kaw shajup manat hpaji hte dang la sai re.

Alain Ngalani mung laiwa sai aten hta, mungkan One Championship Heavy Weith shing jawng poi hta Japan mungdan na ginsup ninghkring Sekine Hideki hte ginsup ai shaloi seconds 11 aten laman lawan ladan htawng shadang kau lu ai wa rai nga ai. Ndai lang na shingjawng poi hta gaw Nsang Awng La hpe asum jaw ra mat ai.

Du na 2018 ning February shata hta gaw, shawng ningnan lang ngu na Champion hpe makawp ai ginsup poi bai galaw na re lam chye lu ai.