Num Lang mare na Asak (51) ning re ai Jan Mahkaw Roi, roi rip sat hkrum
Masat (5) Dap Ba, Masat (25) Dap Dung ginra, Num Lang mare hta asak (51) ning re ai Jan Mahkaw Roi hpe, Myen hpyen dap ni kawn roi rip sat da ai lam chye lu ai.
Jan Mahkaw Roi gaw July shata 14 ya shani hkying 10:00am aten hta ningrum ningtau wa Salang Lau Yin hpe Hka Dawng Pa hkauna pa de shat sa sa na matu nta kaw na pru mat wa ai re.
Shana du tim nta de bai du wa ai lam nnga ai majaw 15 ya jahpawt aten, Salang Lau Yin hte kasha ni hkan tam ai hta Myen hpyen dap ni roi rip sat da ai moi mang hpe sha sa mu la ai re lam hpe chye lu ai.
Uru Ginwang Ginjaw, Masat (9) Dap Ba, Masat (44) Dap Dung ginra, Hkum Tssai Zup nawku jawng kawng grup yin hta mung Gumshem Myen hpyen hpung ni hte KIA hpyen hpung ni gasat gala majan byin ai lam chye lu ai.
Gumshem Myen hpyen hpung ni gaw July shata 15 ya shani hkying 9:30am aten hte 9:55am aten laman, Microwave Bum mayan hta gasat poi byin nna yu wa ai rai nna, Hkum Tsai Zup nawku jawng kawng grup yin hta KIA hpyen hpung ni hte kalang bai gasat poi byin ai lam re.
Myen hpyen hpung ni gaw Hk.L.Y (42) dap na Dap Up Maj.Zaw Myo Than hte Hk.M.Y (116) dap na Maj. San Aung yan woi awn ai n-gun (70) daram hpung ni re hpe mung chye lu ai.
