Numwawn numla hpuja hte seng ai bawngban hpawng galaw
Wunpawng Mungdan Shanglawt Asuya, Htunghking hte Laili Laika Magam Dap hte Laiza Muklum Uphkang Rung kawn, woi awn galaw ai numwawn numla hpuja hpaga hte seng ai bawngban hpawng hpe June shata 17 ya shani kaw nna, 18 ya shani du hkra Laiza kaw galaw nga ai lam chye lu ai.
Bawngban hpawng galaw ai hte seng nna, Htunghking hte Laili Laika Magam Dap Lit Hkam, Salang Kaba Chyana Zau Awn tsun ai hta
“Wunpawng amyusha ni a htunghking law law nga ai, nkau mi lachyum hku nna ginlen lang ai, nkau mi lachyum nchye mat ai, htunghking lachyum manu hpe ahkrai la nna dai lachyum manu hpe manu shadan nna, anhte amyusha ni a rawt jat mayet maya kalu kaba, nga mu nga mai ai, kahkin gumdin bawngring lam hta grau nna hpadi hpadaw tai ai akyu rawng ai htunghking laisat laisa maka ni hpe ginlen lang wa lu hkra, numwawn numla hpuja hpaga hte seng ai lam hpe ningmu jahkrum rai nna, ya lang nga ai laili laika ni hpe galai la na, shading sharai la na matu yaw shada let hpawng ai lam re” nga nna tsun ai.
Numwawn numla htung lailen gaw, ginra hta hkan nna shai hkat ai lam ni nga ai majaw, shayawm mai ai hpuja hpaga daw ni hpe shayawm na lam hte seng nna, Laiza muklum kata nga ai htunghking mungman salang ni hte bawmban ai re lam chye lu ai.
Hpawng hta laiwa sai 2009 ning hta bawngban dawdan shagrin da sai lam ni hpe prat masa, ja gumhpraw arung arai manu hta hkan nna bai jahkrup bawngban sharai la ai lam ni galaw ai hta Laiza muklum kata na htunghking mungman salang ni, amyu shayi ni yawng marai (50) jan sa du shanglawm ai lam chye lu ai.
