Nursing and Midwife Diploma tsi jawng hpaw sa wa na matu jawngma hkapla nga
Wunpawng Mungdan Shanglawt Asuya, Mungdan Hkamja Dap Ginjaw Rung, Jawng Wunkat Makan Dap kaw nna hpaw sharin nga ai, masat yan (13) Nursing and Midwife Diploma tsi jawng hpe hpaw sa wa na lam chye lu ai.
July shata praw (1) ya shani kaw nna, masat yan (13) Nursing and Midwife Diploma tsi jawng lung na jawngma ni tinang hte ni nawn ai Ginwang Ginjaw hkamja rung de shawk shawn form hpe sa la nhtawm, July shata (31) ya shani nhpang hkrat ai sha shawk shawn mai sai lam, jawng komiti ni kaw na chye lu ai.
Jawng lung na jawngma ni gaw, grit htum dakkasu shang san poi awng ra na (matsing- old text tsang (10), new text tsang (12), hkamja lam kaja ra na, hkum tsaw shadang la (5’) num (4’10”) lahta rai ra na, nanghpam, tsa chyaru, malut hka-yawm nlu sha ai wa rai ra na, num sawt la sawt nrai na, hkum hkrang dawchyen hpring tsup ai rai ra na, kyang lailen kaja ra na, hkum hkrang hta maksam (tattoo), kara hpan amyu myu chya da ai wa nrai ra na, asak 16-22 lapran mahkawn shabrang rai ra na hte English laika jawng shang ahkang sanpoi htai awng ai wa rai ra na lam chye lu ai.
Matut nna jawngma ni hta yup ra hpun nba, shinggan hpun palawng man 8, tsi dictionary, nurses dictionary, stethoscope, Bp cuff, hpyen hpun palawng man 1 (ningpawt ninghpang hpyen hpaji), nhtu 1 (n-gang lawm), nurse coat, cap, kyepdin (slipper ahpraw), kara majaw (capping day) a matu gumhpraw ni lawm sa ra na lam chye lu ai.
Jawng lung ladaw hpe 3 ning masat da ai rai nna, jawng hpe gaw September shata 15 ya shani kaw nna hpaw sharin sa wa na hta dai ning na jawng lung ladaw hta jawngma marai (80) hpe sha hkapla sa wa na re lam chye lu ai.
