Nursing diploma hte Midwife tsi jawng ma ni hpe tsi baw chyawp shagup hpawng lamang galaw
Laiza Muklum, mungshawa tsi rung wang Wunjat Gawknu kaw October shata 30 ya jahpawt hkying 10:00am aten hta Ginjaw Hkamja Dap kaw nna woi awn galaw ai masat yan ( 8 ) Nursing diploma hte Midwife tsi jawng baw chyawp shagup hpawng lamang galaw ai lam chye lu ai.
Dai ni gaw ningpawt ninghpang sharin ai shata 6 hpring sai re majaw tsi rung hkan, tatut shaman shakyang hka ja sa wa na matu, palawng hpraw hte tsi baw chyawp shagup ya ai rai nna, shata 6 bai sharin ai hpang she jawng yu na re lam chye lu ai.
Sharin ginhpan ( Subject ) ni hta Nursing ni hpe gaw, machyi masha ni hpe tsi gawn lajang tsi jaw ai hpaji, Midwife ni hpe gaw shangai chyinghkai gawn lajang ai hpaji ni hpe madung sharin ya ai re lam, Ginjaw Hkamja Dap Ningtau Amu Madu, Du Kaba Kadang Tu Awng tsun ai.
Dai ni tsi gup chyawp hkamla lu ai jawng ma ni gaw, Nursing diploma na marai 43, Midwife na marai 42, yawng rai yang marai 85 hkam la lu sai, ndai hpawng hta Ginjaw Hkamja Dap na magam gun ni hte Muklum kata na Hkamja Du ni shanglawm ai lam chye lu ai.
