Nursing hte Midwifery Diploma jawng hpaw hpawng galaw
Wunpawng Mungdan Shanglawt Asuya, Ginjaw Hkamja Dap kaw nna hpaw sharin nga ai, Masat yan (12) Nursing hte Midwifery Diploma jawng hpaw hpawng lamang hpe August shata 13 ya shani galaw la lu sai lam chye lu ai.
Hpawng lamang hta Ginjaw Hkamja Dap Ningtau Lit Hkam, Du Kaba Singnan La Hkam kaw nna tsi jawng hpaw mungga shaga ai hta
“Tsi hpaji mung majan gasat ai bungli langai re, nanhte kanau kasha ni chye na ai gaw shawnglam de sa ai hpyen du, hpyenla ni sha majan gasat ai ngu mu na re, hpyenla ni gasat ai gaw shinggyim masha hku na dip up sai chyup ai ni hpe gasat ai, anhte gaw shinggyim hkum hkrang hpe jahten sharun ai ana ahkya ni hpe gasat ai Magam Dap anhte rai sai re majaw, kanau kasha ni dai hpe dum nna grai shakut ga” nga nna tsun ai.
Nursing hte Midwifery Diploma jawng hta jawng lung sa wa na jawngma yawng marai (270) nga ai hta la kasha marai (27), num kasha marai (243) rai nna, jawng lung ladaw (3) ning re ai lam chye lu ai.
Hpawng lamang hta Ginjaw Hkamja Dap Ningtau Lit Hkam, tsi jawng magam gun ni, sharin sara ni, jawngma ni hte nawku hpung woi sara ni yawng marai (425) sa du shanglawm ai hte galaw la lu sai re lam chye lu ai.
