Nyein Suzi Pukma 19 hte amu hpaw da hkrum ai Salang Zukdaw Tsawm Naw hpe Myitkyina tara rung kawn gumhpraw dam kyats 30000 (Mun Masum) hte shangut
72 lang na Jinghpaw Mungdaw masat ninghtoi hte seng nna, shawa n-gun madun lamang kaw lawm ai Salang Zukdaw Tsawm Naw hpe Myitkyina Masat (1) Balik Dap kaw na Myone Balik Du Myint Moe kawn January shata 15 ya shani Nyein Suzi Pukma 19 hte tara amu hpaw da ai rai nna, January shata 17 ya shani Myitkyina tara rung kawn Nyein Suzi pukma 19 hte gumhpraw dam Mun 3 hte amu hpe daw dan hparan ya ai re lam chye lu ai.
“January 10 ya shani hta galaw ai, 72 lang na Jinghpaw Mungdaw Masat nhtoi ngu ai ga si hpe Jinghpaw laika hku nka lang na matu galaw wa ai lam hpe nra sharawng ai majaw, shawa n-gun madun ai lam galaw ai hta ahkang nhpyi ai ngu nna Nyein Su Zi Pukma 19 hte tara jawat ai re lam” Jinghpaw Wunpawng Htunghking hte Laili Laika Hpung Ginjaw Kithkai Magam Dap a Hpa-awn Sara Zukdaw Tsawm Naw tsun ai.
N-gun madun ai lamang hpe kadai kaw na woi awn ningbaw nna galaw ai lam nnga ai, n-gun madun ai shawa masha ni kadai mung tinang a myit hkawn ai hku nna, sa du n-gun madun ai hta Balik Dap kawn Salang Zukdaw Tsawm Naw hpe n-gun madun lamang woi awn ai wa re nga nna tara jawat ai re hpe chye lu ai.
72 lang na Jinghpaw mungdaw masat nhtoi hta Jinghpaw mung ngu ai ga si hpe Jinghpaw laika hku nlang ai sha, Myen laika hku lang ra ai ngu, asuya matsun wa ai majaw, nra sharawng ai mungshawa masha ni kawn Myitkyina manau wang kaw n-gun madun lamang galaw ai majaw, Myitkyina Masat (1) Balik Dap kaw na, Myone Balik Du Myint Moe kawn Salang Zukdaw Tsawm Naw hpe tara amu hpaw da ai hpe January 17 ya shani hta Myitkyina tara rung kawn gumhpraw dam Kyats 30000 hte shangut ya ai re lam na chye lu ai.
