Oi Law dap shara hpe KIA pawng hpawm hpyen hpung ni bai gasat zing

KIA Masat (2) Dap Ba, Masat (14) Dap Dung ginra na Oi Law dap shara hpe KIA pawng hpawm hpyen hpung ni January shata 27 ya shani bai gasat zing la lu sai lam chye lu ai.

Oi Law dap shara gaw KIA pawng hpawm hpyen hpung ni gasat zing madu da ai shara rai nna, January shata praw kawn gumshem Myen hpyen dap hte Min Zay Thant P.T.Ts hpung ni n-gun kaba hte htim gasat ai sha n-ga, nbungli, drone, laknak kaba ni hte mung gap gasat ai majaw, jahkring mi gan yen kau da ai shara hpe January shata 27 ya shani bai gasat zing la lu ai re lam, lit nga ai salang ni kaw na chye lu ai.

Waimaw Lamyang hpyen man de mung, gumshem Myen hpyen dap hte P.T.Ts pawng hpawm hpyen hpung ni January shata 20 ya shani kaw nna, hpyen shamu shamawt htu shadut ai lam ding yang galaw nga ai majaw, shani shagu gasat gala majan byin nga ai lam chye lu ai.