One Championship Ja shingkyit hpe Nsang Awng La padang dip la
Mixed Martial Art ( MMA ) ginsup ai kaw mying gumhkawng nga ai Nsang Awng La gaw, June 30 ya shana Yangon Muklum သု၀ဏၰ ginsup wang kaw Russia Mungdan na One Championship Ja Shingkyit madu da ai, Vitaly Bigdash hpe padang dip, htwi dang la lu sai hpe chye lu ai.
Laiwa sai 2016 ning hta Indonesia Mungdan Jakarta Muklum kaw ginsup ai shaloi Nsang Awng La shi shaman shakyang ai ninghtoi 10 ya sha lu shaman ai majaw, Vitaly Bigdash hpe sum da ai re. Dai majaw ndai lang bai ginsup ai poi hta dang la lu na matu, shi hku nna tau nau hkyen shajin ai lam hta malu masha hte Training ni hpe manu mana arang bang shakut shaja atsam dat nna, shaman la ai hte ya na ginsup poi hta htwi dang la lu sai rai nga ai.
Vitaly Bigdash gaw, ginsup poi 9 lang hta sum poi nnga ga ai raitim ndai lang shawng ningnan sum ai poi rai nga ai. Nsang Awng La gaw, ginsup poi 29 lang kaw na 9 lang sum 19 lang dang ai.
Nsang Awng La gaw, MMA ginsup mungkan de, laiwa sai 2005 ning kaw na du shang wa ai rai nna, 12 ning na ai hpang Mungkan a One Champion ninghkring langai byin wa sai re.
Myen hpyen dap hku nna mung, Nsang Awng La hpe shagrau sha-a ai lam galaw ai. Dai na de hkying 6:00pm aten kaw nna, Yangon Muklum Jinghpaw Wunpawng Hkalup Hpung Nawku Htingnu kaw mung, Nsang Awng La hpe Jinghpaw Soi nhpye N-ga ni hte shagrau sha-a lamang galaw ai lam chye lu ai.
