Online ntsa kaw nna Tara Upadi hte seng ai TOT wunkat sharin na
Htoi Gender and Development Foundation ni kawn Tara Upadi hte seng ai ningmu jahpaw wunkat teacher of training (TOT) hpe May shata 18 ya shani kaw nna 22 ya shani du hkra manga ya tup, online ntsa kawn sharin ya na re lam chye lu ai.
“yaw shada lam gaw CSO hkan galaw nga ai magam gun ni, Community member ni hku nna tara upadi hte seng ai ningmu hpaji lu wa na matu, grau nna gaw jinghpaw mung hta nga ai mungshawa ni yawng case hte seng nna byin hkrum hkra wa ai shaloi tara upadi hpe jaw ang ai hku chye jai lang lu na matu re” nga nna Htoi Gender kaw na saranum langai tsun dan ai.
Tara rung kaw du wa ai shaloi raitim mung chye ging chye mai ai Law introduction, Basic law, Humane hte seng ai lam ni hpe sharin ya mat wa na re lam matut tsun dan ai.
TOT wunkat hpe myit lawm nna sharin hkamla mayu ai ni gaw Two ways Teaching Method hpe ra sharawng ai wa rai ra na, wunkat hpe manga ya tup sharin hkamla lu ra na, hpaji madang graduate langai ngai lu da ai wa rai ra na, Gender, Human Right, Amyu shayi ahkaw ahkang ni hte seng ai lam hta mahkrum madup lu ai wa rai ra na, asak 25 ning hte 45 ning lapran na rai ra na, hku hkau kanawn mazum ai lam hkrak ai wa rai ra na, TOT sharin hkamla ngut ai hpang kaga masha ni hpe bai ginlen ya lu ai wa rai ra na re.
Sharin achyin ya ai lam hpe online ntsa hta sharin ya na raitim nhtoi manga ya tup hta jai lang mat wa na phone gumhpraw hpe Htoi Gender kaw nna shawang tsawra myit hte jaw bang ya na rai nna wunkat sharin manu hpe mung manu jahpu nla ai sha sharin ya na re lam chye lu ai.
