Online ntsa tara nshang ai hpai da bungli galaw sha ai wuhpung wuhpawng ni a majaw, Miwa Asuya kawn myihprap wan dawm jahkring kau ya nna mung mare masha ni yak hkak hkrum nga

Mungmyit Sinli, Munggu Ginwang kata hta online ntsa tara nshang ai gumhpraw masu hpai da ginsup bungli lagu galaw sha nga ai wuhpung wuhpawng ni a majaw, Miwa Asuya kawn May shata 31 ya shani kaw nna Munggu, Mung Baw hte Mung Lung mare ni hta myihprap wan dawm jahkring kau ya nna, mung mare masha ni yak hkak hkrum nga ai lam, buga masha ni shana wa ai kaw na chye lu ai.

Kuthkai P.T.S ni hte ginra Myen Asuya Rung ni pawng hpawm nna Miwa lauban ni hte online ntsa tara nshang ai gumhpraw masu ai hpai da ginsup bungli (Chya Hpyen Wang Law) lagu galaw ai sha n-ga, Myen Mungdan kata ntara ai hku bungli lagu galaw nga ai Miwa Gumsan Mungdan masha ni hpe woi la na matu, Myen Asuya P.T.S ni hpe tsun ai raitim, shanhte a masha ni hpe nrim sa ya ai majaw, Miwa Asuya kawn ya na zawn myihprip wan jahkring kau ya ai re lam, Buga masha langai tsun dan ai.

Miwa Asuya kawn myihprap wan dawm jahkring kau ya ai raitim, ntara ai hku nna galaw sha nga ai wuhpung wuhpawng ni gaw, shanhte a wan jak hte naw galaw nga ai rai nna, mung mare masha ni gaw myihprap wan nlu mat ai majaw, grai yak hkak hkrum nga ai lam, buga masha langai matut tsun dan ai.

Ndai tara nshang sawt ai gumhpraw galaw nna online ntsa kaw gumhpraw masu sha ai masha ni hpe mu chye hkrup ai rai yang, seng ang ai mare lawk salang ni hpe shiga jaw na hte ndai tara nshang ai wuhpung wuhpawng ni hpe lu jasan kau yang she, Miwa Asuya kawn Myihprap wan bai matut jaw na re lam, Munggu Wan Rung kawn June shata praw 2 ya shani ndau da ai lam na chye lu ai.