Pa Jau hte Laiza grup yin hta wan gumhpraw nhta na matu shata 2 masat
Wunpawng Mungdan Shanglawt Asuya Sut Masa Magam Dap kaw nna, Laiza grup yin hte Pa Jau mare kaw shanu nga ai mungshawa ni a shani shana jai lang taw nga ai wan unit gumhpraw hpe nhta na matu, March shata hte April shata 2 laman masat da ai lam chye lu ai.
“Asuya kaw nna tatut ja gumhpraw hku nlu madi shadaw ai raitim, mungshawa ni shani shagu jai lang taw nga ai wan unit gumhpraw hkyamsa u ga matu yaw shada let, Pa Jau mare hte Laiza grup yin kaw jai lang ai wan unit ni hpe nhta ga ngu ai, aten ladaw hpe gaw March shata hte April shata htum du hkra, shata 2 laman ngu nna ntsa lam masat da ai re” nga nna Sut Masa Magam Dap Amu Madu Du Kaba Naw Ut tsun ai.
Ya aten hta wan unit gumhpraw n jaw ra ai ngu ai hku nna, mungshawa nkau ni chye na la jang, wan gawnhkang ai hta ram ram gawng kya wa na masa nga ai re majaw, wan hpe shawoi lang ai hte maren ra ai hta njan ai hku lang yang gaw grau kaja ai. Ginhtawng ten hta gaw hka hkyet ai ten re majaw, wan law law shapraw na matu yak ai, myi hprap wan hpe yawng sadi sahka hte jai lang na matu, Du Kaba matut tsun ai.
Asuya gaw Hung Tsing Company hpe unit mi hta wan gumhpraw Gyaw 4 jaw ra ai rai nna, mungmare masha ni kaw na wan unit gumhpraw nhta ai raitim, asuya gaw Company hpe wan gumhpraw ding yang jaw nga ai re lam chye lu ai.
Covid-19 ana zinli makawp ninghkap komiti kaw nna tsun da ai hta, ndai shata 2 laman gaw shawng ningnan tau hkyen shajin ai hku nna masing jahkrat galaw ai re lam, ana zinli hpe ninghkap ai lam hta matut galaw ra ai lam ni nga yang, asuya kaw nna bai myit ya na re lam chye lu ai.
Pa Jau mare kaw jaw shabra ai wan gaw, Buga Company, Pa Jau hka wan jak kaw na shapraw ai wan hpe jaw ai rai nna, Laiza Muklum grup yin hta jaw shabra ai wan gaw, Munglai Hka, Hpaga Hka Zup wan jak kaw na shapraw ai wan hpe jaw shabra ai re hte ndai wan jak gaw Miwa Hung Tsing Company ni galaw da ai hpe Wunpawng Mungdan Shanglawt Asuya Sut Masa Magam Dap kaw nna gawnhkang nga ai re.
