Pajau hka wan jak hpaw lamang galaw
KIO Ginjaw sut masa magam dap a kata na Buga Company kaw nna lit la galaw ai pajau hka wan jak hpaw lamang hpe 2019 ning January 17 ya hkying 11:00 am hta galaw ai lam chye lu ai.
“Pajau hka wan jak hpe galaw na matu 2012 ning praw hta survey shawng galaw ai.Dai hpang 2014 ning October shata kaw na bungli galaw hpang ai.2017 ning June shata hta gaw wan jak ngut nna wan jaw chyam yu ai lam ni nga ai.Wan jak galaw ai ten hta mayak lam amyu myu nga ai. Gara wa gaw grau yak ai ngu gaw nnga ai,yawng gaw shi hte shi yak ai lam ni hkrai re,dai hta langai mi hpe tsun ga nga yang 2017 ning June shata hta gaw gap masing ngut kre wa ai ten August shata hta marang kaba htu nna wan jak hka len ai hkapite hpe madi ai ga gyi nna bat mi daram bai gaw gap galaw la ra ai”.
“Ndai wan jak gaw Megawatt(14) nga nna madung Myitkyina hte Waimaw de jaw nga sai re,len ai wan sumri ni kaji ai majaw wan n-gun yawng nlu shalet jaw shi ai.Wan sumri kaba galai lu ai hpang gaw wan n-gun yawng lu jaw na re” Nga nna buga company a Managen Director DKB. Kareng La Tawng tsun ai.
Pajau hka wan jak hpaw hpawng hta magam dap,makan dap na magam gun salang ni,Myo mare de na saw shaga da ai salang ni yawng (780 ) sa du shang lawm ai hte ngut kre la lu sai lam na chye lu ai.
