Pan Nan Din ginra de COVID-19 ana zinli du shang wa na hpe ginra masha ni myit tsang nga
Putao Ginwang, Pan Nan Din ginra gaw Putao Muklum hte tsan ai shara re sha n-ga, hkrunlam mung yak hkak ai majaw COVID-19 ana zinli bai du shang wa ai rai yang, lam shagu hta yak hkak jam jau hkrum wa mai ai majaw COVID-19 ana du shang wa na hpe ginra masha ni myit tsang nga ai lam na chye lu ai.
Dai ginra de sumtsan kaw na du shang wa ai masha ni hpe pat hkum ai lam galaw nga ai raitim, COVID-19 ana zinli du shang wa ai rai yang ginra masha ni kaw hkra machyi hkrum wa mai ai lam ginra masha langai tsun dan ai.
“Sumtsan maigan kaw na wa ai ni hpe hkap jahkring da ai lam galaw ai, COVID-19 kap bra wa yang tsi rung tsi gawk nnga ai re majaw yawng si mat na lam sha nga ai majaw tau hkrau makawp maga ai hku nna hkum pat ai lam galaw ai, anhte ginra kaw Quarantine center ni mung nnga ai corona kumla gaw ganing re baw hpan re ngu ai hte seng nna mung ningmu jahpaw hkaw tsun dan ai lam nnga ai majaw hpa re pi nchye ai sha nga nga ai” nga nna tsun ai.
Dai ginra na mung masha ni gaw kaga ginra de ja gumhpraw tam hkawm na yak hkak nga ai sha n-ga, miwa hkran jarit ni mung pat da ai majaw malu masha ni yak hkak nga ai re lam, Dai ginra hta lai wa sai April shata kaw nna July shata laman, kan mase ana du shang wa ai majaw dai ana a majaw masha marai (11) asak si sum lai wa sai re, ndai lam ni hte seng nna Pan Nan Din ginra masha ni gaw Asuya hpang de lang hte lang tang madun ai raitim, dai ginra na masha ni hpe Asuya kaw nna mung hpa nchye lawm ai zawn ahkyak nla ya ai lam buga masha langai tsun dan ai.
“Asuya hpe tang madun ai shi ga dap ni hpe mung tsun dan ai raitim, gara hkamja dap ni mung nsa wa ai, Asuya lit nlu la ai ngu gaw nmai byin ai dasang n dum masu su nna tawn da ai lam re ngu mu mada ai” nga nna tsun ai.
Kan mase ana byin ai ginra de garum ningtum hpung ni kaw nna sa du garum jaw ya ai a marang, ya aten ana ram ram hkyem sa wa sai lam, Pan Nan Din ginra kata mare kahtawng 17 daram nga ai rai nna, dai ginra de Putao kaw nna bat mi daram hkawm sa ra ai re lam chye lu ai.
Photo Credit; Fb
