Pan Nan Din muklum kata hkawm sa hkawm wa lam nhkrang ai majaw, ginra masha ni yak hkak nga

                                                                         Photo Credit; Sanlu Ram Seng

Putao lahta Pan Nan Din muklum kata hkawm sa hkawm wa lam nhkrang ai majaw mare masha ni a matu malu masha grai yak hkak nga ai lam chye lu ai.

“Pan Nan Din muklum gaw Putao-Nawng Mun Ginwang daw kaw lawm ai rai nna mungshawa 1900 jan nga ai muklum langai re. Raitim Pan Nan Din myo du hkra hkawm sa hkawm wa lam nhkrang ai majaw grai yak hkak nga ga ai. Dai re majaw seng ang ai Asuya ni kaw nna ndai maw daw lam hkrang hkra galaw ya na matu ra sharawng ga ai” nga nna ginra masha Sanlu Ram Seng tsun ai.

Lai wa sai September shata 23 ya shani hta mung marang htu sawng nna hka kaba wa ai hte ga gyi wa ai majaw Putao-Nawmg Mun hte Pan Nan Din lapran na mahkrai hkrai noi daw mat wa ai re.

Mungshawa ni a matu hkawm sa hkawm wa lam hte mungshawa ni a kan bau magam bungli a matu n-gu, sau, jum hte kaga malu masha gun rai htaw shalai ai hta ndai mahkrai hpe sha jai lang ai re.

                                                                               Photo Credit; Sanlu Ram Seng

Ndai mahkrai gaw Pan Nan Din muklum ting na mungshawa ni yawng jai lang ai mahkrai rai nna, Muklum ting hta rai yang ndai mahkrai langai sha nga ai re.

Ndai mahkrai daw mat wa ai lam hte seng nna, Seng ang ai Asuya hpang de tang madun da sai rai nhtawm ya hkyak hkyak jahkring jahkra gan lai na matu gram lajang ya na masing nga ai raitim ya aten du hkra gram lajang ai lam nnga shi ai re hpe mung chye lu ai.

“Anhte Pan Nan Din ginwang hta gaw asuya ni kaw nna budget jahkrat ya ai raitim nlaw nla ai sha jahkrat ya ai. Dai hte sha gaw hpa mung nlu galaw ai, mayak mang hkang law law nga ai shara mung re majaw hkawm sa hkawm wa lam ni hpe grau kaja hkra galaw shangun mayu ai, bai nna hkamja lam, hpaji lam ni hta mung mayak law law nga wa ai shaloi gaw ginra masha ni a matu shaning shagu ngu na daram tsin yam hkrum sha nga ga ai” nga nna ginra masha ni tsun dan ai kaw na chye lu ai.

                                                                          Photo Credit; Sanlu Ram Seng

Pan Nan Din muklum kata hta hkawm sa hkawm wa lam nhkrang ai hta sha n ga, Muklum ting hpe matut mahkai galaw ya ai mahkrai hkrai noi mung daw mat ai re majaw ya aten hta mungshawa ni a matu gun rai manu rawt jat nga ai hte malu masha manghkang law law byin nga ai re hpe mung chye lu ai