Pang (8) Sara Wun Jawng yu hpawng galaw

Wunpawng Mungdan Shanglawt Asuya Mungdan Hkamja Dap kaw nna lit la hpaw sharin ya ai Pang (8) sara wun jawng yu hpawng hpe August shata 22 ya shani hkying 10:00am aten hta Ginjaw Hkamja Dap Wun Jat Gawknu kaw galaw la lu sai re.

Hpawng lamang hta KIC Ningbaw Kaba Du Daju Jum Nban La hte rau KIC Ningbaw Malai (II) Du Daju Zawng Buk Htan, Ginjaw Komiti Salang ni, Magam Dap, Makan Dap shagu na saw shaga da ai magam gun ni hte tsi sara wun ni sa du shanglawm ai re.

KIC Ningbaw Kaba Du Daju Jum Nban La kaw nna tsi sara wun ni hpe numhtet shatsam mungga shaga ai hta, “Daini anhte rawt malan prat naw re wunpawng mungdan shanglawt hpung gaw mungdan madu lu ai Awmdawm ai gumrawng gumtsa mungdan gawde na matu hkrang shachyaw taw nga ai hta Hkamja dap mung lawm ai re, dai majaw machyi masha ni hpe tsi gawn lajang ai lam hta gumrawng gumtawng myit n rawng ai sha si mani ai hte tsi gawn lajang ya lu ai magam gun kaja ni rai u ga” nga nna mungga hta tsun ai.

Hpawng hta daini jawng yu ai sara wun nnan ni marai 24 hpe Mungdan Hkamja Dap Lit Hkam kaw nna jawng yu lekmak shagrau ya ai hte hpawng hpaw mungga shaga ai hta, daini kaw nna gaw tsi sara wun ngu ai mying hte shanglawt lu na matu shanglawt rawt malan magam bungli gun hpai nga ai ten wunpawng amyu sha ni hte mungdan sha ni a hkamja lam hpe gun hpai sa wa na ni rai sai, tsi magam bungli hta tsi sara wun ni hkamla ra ai ga sadi ga shaka hte maren tup hkrak hkan sa nhtawm amyu sha ni kam hpa ging ai magam gun ni byin hkra shakut sa wa ga nga nna hpawng hpaw mungga hta tsun ai.

Daini jawng yu ai sara wun nnan ni gaw 2016 ning March shata praw 6 ya shani kaw nna Miwa Gumsan Mungdan Mang Shi Muklum Tsi Hpaji Sharin Jawng kaw tsi hpaji sharin hkamla nna 2019 ning March shata 20 ya shani Mungdan Hkamja Dap de bai du wa nhtawm, April 20 ya shani kaw nna tsi rung tsi jaw gawk ni hta ta tut hka ja bungli shang nna daini sara wun jawng yu lekmat shagrau hkamla ai re lam chye lu ai.

Photo Credit; Mai Mai Seng Lahpai, Lamuk Ahnaw