Pat hkrum mungshawa lawt lam shakut ai hta htawng sharen hkrum lai wa sai, hpa-awm marai 3 hte mungshawa hkrumzup sanglang akyu hpyi hpawng galaw
Myitkyina Muklum Shatapru manau wang majoi gawknu kaw pat hkrum mungshawa lawt lam shakut ai majaw, htawng sharen hkrum lai wa sai hpa-awn marai 3 hte mungshawa ni hkrumzup sang lang hpawng hpe May shata praw 1 ya jahpawt hkying 9:00am aten kaw nna shani ka-ang hkying 12 jan du hkra galaw ai lam chye lu ai.
“Anhte marai 3 htawng kaw na lawt pru wa sai re majaw, akyu hpyi hpawng galaw la let, mungshawa hte hkrumzup ai anhte a magam bungli hte seng nna tsun dan ai, anhte htawng kaw na lawt pru wa sai raitim mara lawt sai nre. Mara naw lu ai masa re majaw mara nlu ai ngu ai teng man ai mahtai lu hkra Nay Pyi Taw tara rung daju de lung ra ai lam hpe sanglang dan ai, htawng kaw rawng ai shaloi hkrum sha ai lam ni hte mu mada ai ningmu ni, matut nna anhte gara hku naw galaw ra ai lam ni, mungshawa ni a ga san ni hpe mung htai dan ai lam galaw ai” nga nna Saranum Nang Pu tsun ai.
Hkrumzup sanglang hpawng hta hpyen yen kaw na kanu kawa ni, nawku hpung na ningbaw ningla hpung masha ni, CSO na ningbaw ningla ni hte Htunghking Hpung kaw na ningbaw ningla ni yawng marai 500 daram sa shang lawm ai lam chye lu ai.
