Pawng hpawm hkungran ga shaka la akyu hpyi hpawng galaw
KIA Masat 8 Dap Ba, Sinna Dingda Ginwang Ginjaw, Dap Ba Daju gawknu kaw pawng hpawm hkungran ga shaka la akyu hpyi hpawng hpe January shata 10 ya shani hkying 11:00am aten hta galaw ai lam chye lu ai.
Hpawng hta Dabang Komiti Tingnyang Up, Du Kaba Npyen Tu Len kaw nna ya na zawn tsun hta
“Mungmasa, hpyen masa sat lawat mayak hte dinghkrai mayak lam amyu myu a majaw, hkungran lakmat rai nlu la shi ai magam gun dinghku ni hpe Magam Dap, Makan Dap kaw nna kanu kawa tai let hkungran ga shaka la ya ai lam re” nga nna tsun ai.
Hkungran ga shaka la akyu hpyi hpawng hta magam gun dinghku htinggaw (4) hpe pawng hpawm hkungran ya ai rai nna, hpawng hta Sinna Dingda Ginwang Ginjaw Dinggrin Komiti salang ni, Magam Dap, Makan Dap hkan na magam gun ni, mungshawa mare masha ni shawnglawm ai hte galaw la lu sai lam chye lu ai.
