Phone line hte internet line pat kau ya ai majaw mung mare masha ni yakhkak nga

Mungmyit Sinli Ga, Muse hte Namhkam ginra kata, gumshem Myen hpyen dap kaw nna, phone line hte internet line pat kau ya ai majaw, mung mare masha ni yakhkak nga ai re lam ginra masha ni kaw na chye lu ai.

December shata 20 ya shani kaw nna dai ni du hkra, phone line hte internet line pat kau ya ai majaw, Muse hte Namhkam kata na mung mare masha ni kan bau magam bungli ni hte matut mahkai lam ni yakhkak ai lam law law hkrum nga ai hpe chye lu ai.

Ya na zawn pat da ai gaw gumshem Myen hpyen dap kawn, Miwa mung kaw na shang wa ai gun rai modo ni hpe jep joi ra ai ngu ai ga baw hte pat da ai re lam chye lu ai.

Phone line hte internet line pat hkum da ai hta gumshem Myen hpyen dap ni kaw nna, Miwa hkran kawn shang wa ai modo ni hta shanhte matsing da ai modo nambat lawm ai modo ni hpe kalang ta rim woi mat ai re hpe mung chye lu ai.

Ndai zawn gumshem Myen hpyen dap kaw nna, phone line hte internet line pat hkum da ai gaw Sam mung kaw sha nrai nhtawm, Jinghpaw mung kata hta mung pat da ai lam ni nga ai re hpe chye lu ai.