Prang Yang kaw Myen hpyen dap drone bawm jahkrat bun ai majaw, mungshawa si hkala hkrum

Ga Ra Yang Gingwang Daw, Prang Yang Ninghtawn kata kaw        gumshem Myen hpyen dap ni drone bawm wa jahkrat bun ai majaw, mungshawa si hkala hkrum ai lam chye lu ai.

January shata 20 ya shani Ga Ra Yang Gingwang Daw, Prang Yang Ninghtawn kata na langu sun langai kaw, gumshem Myen hpyen dap ni drone bawm wa jahkrat bun ai majaw, mungshawa marai (2) asak si sum mat nna, marai (2) hkra hkala ai lam, ginra masha ni tsun ai.

Asak si sum mat ai yan gaw, langu sun madu lauban Xia Wu Jung hte Mg. Htin Lin asak (28) ning rai nna, hkra hkala mat ai yan gaw, Shy. Ga Byen Ja Ngai hte Mg. Yin We Oo yan re lam chye lu ai.

Ya aten gumshem Myen hpyen dap gaw, masa lam amyu myu hta hkrat sum nga sai majaw, gasat gala majan nnga ai shara ni hta nbungli baw, drone bawm ni hte gap gasat ai lam ding yang ngu na galaw nga ai re.