Pre- Class sharin la mayu ai jawngma ni hpe mying jahpan hkap la nga sai
Wunpawng Mungdan Shanglawt Asuya kaw nna hpaw sharin ai Mai Ja Yang Amyusha College a 2020-2021 ning hpaji ladaw hta Pre-Class hpaji sharin la mayu ai jawngma ni a mying jahpan hpe June shata ka-ang du hkra hkap la na re lam chye lu ai.
Wunpawng Mungdan Shanglawt Asuya kaw nna May shata 20 ya shani du hkra lockdown tawn da ai re, ndai lockdown gun kau ai hpang wang lu wang lang hkawm sa lu ai aten she jawng hpe hpaw na re lam, Mai Ja Yang Amyusha College Jawng Up Saranum Kaba Dr. Nangzing Lu Awn tsun ai.
Covid-19 ana zinli a majaw, jawng nlu hpaw wa ai rai yang online hku nna laika sharin na matu myit da ai lam nga ai, online hte laika sharin ai ladat hpe gara hku galaw sa wa na ngu ai lam hpe magam gun ni naw jahkrup nga ai re nga nna, Saranum Kaba matut tsun ai.
Pre-Class lung na jawngma ni hpe jawng lung ladaw shata 6 a matu, jawng lung jarik (nga manu, sha manu, laika sharin manu yawng) Miwa Gumhpraw Yuan 1850 masat da ai re lam chye lu ai.
Shawk shawn na jawngma ni gaw asak 25 ning lawu de na rai na, tsang 10 awng sai jawngma ni rai ra na re. Ru hka manghkang byin yu ai labau nnga ai ni rai ra na hte nanghpam malu masha nlu sha ai ni rai ra na re.
Shawk shawn laika pa hpe Mai Ja Yang Amyusha Hkawlik (Mai Ja Yang Muklum) hte Ginjaw Hpaji Dap (Laiza Muklum) ni hta sa la nna, Mai Ja Yang Amyusha Hkawlik de ading tawk shawk shawn mai sai re.
Jawngma shawk shawn ai lam hte seng nna laksan chye mayu ai lam ni nga ai rai yang, Miwa phone hkring dat- 138 8882 6937, Myen phone- 0949271455, Messanger- Lahkang Seng Hkum Naw, Facebook Page- Mai Ja Yang Amyusha College kaw matut sagawn la mai ai re hpe mung chye lu ai.
