Pukma 228 hte htawng dam shata 3 jahkrat hkrum ai Shadang Pawlu lawt pru wa
Myitkyina myo ne tara agyi Salang Tan Htun hpe sumri di ai joi jang jahten jaw ai majaw, pukma 228 hte tara jawat nna shata 3 htawng dam jahkrat hkrum ai Shadang Pawlu gaw, December shata 16 ya jahpawt hkying 7:00am aten hta Myitkyina hkyuk htawng kaw na lawt pru wa sai lam chye lu ai.
Shadang Pawlu hkyuk htawng na lawt pru wa ai aten hta Jan Mai Kawng buga na kanu kawa ramma ni, Wunpawng Mungbawng Ramdaw (WMR) na Salang ni, Kachin Youth Movement na ramma ni hpyen yen na ramma ni hte kaga hkan na ramma ni hku nna htawng chyinghka lam shawng kaw nhtu n-ga jahpye ya, nampan shabawn ni hpe jaw nna sa tau hkalum ai hte Shiga sanglang ai lam hpe galaw ai.
Dai hpang WMR rung de wa nhtawm, Shadang Pawlu a mahkrum madup ni hpe sanglang dan ai lam, WMR ningbaw wa kaw nna mung shatsam mungga tsun nna, Bishop John Zau Li hku nna akyu hpyi shaman ya ai lam galaw ai.
Jan Mai Kawng buga na nawku hpung woi sara kaba ni hku nna mung Shadang Pawlu hpe hkaptau hkalup ai shatsam ga tsun, akyu hpyi ya ai lamang ni galaw ai hpe chye lu ai.
“Myen Mungdan gaw democracy nga tsun taw tim, wanglu wanglang tsun shaga na ahkaw ahkang nlu ai hpe mu mada ai. Ngai htawng rawng mat ai mung hpyen yen ni hte seng nna magam bungli galaw ai a marang e rai nga ai, matut nna hpyen yen hte seng ai magam bungli ni hpe myo kata nga ai ramma ni, hpyen yen na ramma ni, seng ang ai wuhpung wuhpawng kanu kawa ni hte ta gindun nna matut galaw sa wa na, bai nna shinggyim ahkaw ahkang lam hte wanglu wanglang tsun shaga lu ai pinra langai mi du wa lu hkra, tise upadi ni galai shai ai lam de du wa lu hkra lutdaw de tang madun ai lam galaw sa wa na re” nga nna Shadang Pawlu tsun ai.
Shayi Seng Nu Pan kaw nna mung, manang rai nga ai Shadang Pawlu hkyuk htawng na shalawt dat hkrum sai majaw kabu hkamsha ai lam hpe ya na zawn tsun ai.
“Anhte na manaw manang rai nga ai Sara Pawlu le wa ai anhte yawng grai kabu ai hpa na i? nga yang, anhte ramma ni na matu bungli grau nna lu galaw na re ngu hkamsha ai, tara rapra lam hta grau nna ja ja tsap na ngu hkamsha ai” nga nna tsun ai.
Tengman ai lam hta anhte ni gaw ja ja shaga wa na re. Ndai prat hta ramma labau hka nkap shakap ai, hpang e ningbaw ningla tai wa na ramma ni gaw anhte zawn rai, hkam mana sha ai zawn re ni, hkrum katut sha ai zawn re ni, ndai zawn tsin yam ni hpe nhkrum sha sanu ga, n tara ai lam hpe anhte ni gumlang mat na, anhte a mungdan gaw sharawt ai lam hta anhte a dam lada dawdan lu ai ahkaw ahkang shadip jahpang lu hkra, jet ai federal munghpawm mungdan byin tai wa lu hkra tinang dang di lu ai atsam hte kanu kawa ramma ni yawng ta gindun nna myu hte mungdan a matu galaw sa wa ga, nga nna Shayi Seng Nu Pan matut tsun ai.
Shd. Pawlu hte Shy. Seng Nu Pan yan gaw lai wa sai June shata praw 9 ya shani hta hpyen yen tsin yam hkum ai 8 ning hpring ai masat ninghtoi hta hpyen yen mungshawa ni a hkamsha lam hpe, lam ntsa shingni hkrang shala (Steet performance) woi awn galaw ai majaw, nyein suzi pukma 19 hte tara jawat hkrum nna htawng dam nhtoi 15 ya jahkrat hkrum ai re, dai hpang Shyi Seng Nu Pan gaw, September shata 16 ya shani hta hkyuk htawng na lawt pru wa sai re.
Shd. Pawlu gaw Myitkyina myo ne tara agyi Salang Tan Htun hpe sumri di ai joi jang jahten jaw ai majaw Salang wa hku nna pukma 228 hte tara jawat ai, September shata praw 6 ya shani hta Shd. Pawlu hpe hkyuk htawng na shale la nhtawm, Myitkyina myo ne ningtau tara agyi Daw Tin Noi Win kaw nna htawng dam shata 3 bai kahtap jahkrat dat ai hpang, dai ni December shata 16 ya shani hta shata 3 hpring sai majaw hkyuk htawng na shalawt dat hkrum ai rai nga ai.
Photo; Kachin Youth Movement
