Putao ginra hta tam lu tam sha grai yak hkak wa ai majaw asak nhpring ai Ma ni kaw na hkawt Ja htu nna kan bau bungli galaw nga

Putao ginra hta Gumshem Myen Hpyen Dap kaw nna Mungdan a daru magam ahkang aya magra jum tek kau ai aten kaw nna hkawm sa hkawm wa tam lu tam sha grai yak hkak dut dang wa ai majaw, Putao ginra na asak nhpring ai Ma ni Mali Hka kau mayan hta Ja htu nna kan bau bungli hpe galaw sha nga ai lam na chye lu ai.

“Mali hka makau de hkan yu ai shaloi asak (13) ning re tsang (6), tsang (7) lung ai Ma ni kaw na hkawt Ja htu nna lu ai hte mi tam sha taw ai hpe mu lu ai majaw, myit npyaw ai, grai yak hkak taw nga ai masa re. Gaidaw gaida chyahkrai nmai zawn re ni a matu gaw shat ma mi lu sha na matu pi yak wa ai, hkrit tsang hpa gaw re” nga nna Putao ginra na salang Joe tsun ai.

Gumshem Myen Hpyen Dap ni kaw nna n-gun madun ramma ni hte mungshawa ni hpe rim jahkrit shama ai lam galaw ai majaw, April shata kaw nna Putao ginra hta mungshawa n-gun madun lamang hpe gan jahkring da ai raitim, kaga ladat ni hte ninghkap ai lam galaw nga ai re hpe chye lu ai.

Putao ginra na mungshwa ni law malawng gaw, moi laiwa sai ten kaw nna nam maling hpe machyu let kan bau bungli hpe galaw lu galaw sha nga ai raitim, ya aten sumtsaw sumtsan pru hkawm sa ai lam, hkawm sa hkawm wa tam lu tam sha grai yak hkak wa ai majaw, mungshawa yawng Ja htu nna kan bau bungli hpe madung galaw lu galaw sha nga ai lam chye lu ai.

Photo Credit; PutaO Youth