Putao ginra kata Myen hpyen dap ni pawta rim lahkawn ai lam galaw nga

Putao ginra hta gumshem Myen hpyen dap ni mungshawa ni hpe pawta rim lahkawn ai lam galaw nga ai hpe chye lu ai.

Putao Lung Sha Yang, Hkawng Lang Hpu ginra dap jung nga ai gumshem Myen hpyen dap ni gaw, mare langai hpang langai shang nna ramma ni hte la wa ngan ni hpe pawta rim lahkawn nga ai lam, ginra masha ni kaw na chye lu ai.

Gumshem Myen hpyen dap ni hpyen shamu shamawt hkawm ai aten, pawta rim lahkawn hkrum ai mungshawa ni hpe 2, 3 ya na hkra woi hkawm ai lam ni nga ai zawn, nkau mungshawa ni hpe bat hku raitim dat ya ai lam nnga ai hpe chye lu ai.

Ndai zawn pawta rim lahkawn nga ai majaw, Putao ginra Myen hpyen dap hte ni nawn ai mare kahtawng hkan na ramma, la wa ngan ni nam hkan hprawng koi yen nga ra ai re lam chye lu ai.

Putao ginra hta gumshem Myen hpyen dap ni shani shagu ngu na hpyen n-gun jat bang ai lam galaw nga ai hta mungshawa ni hpe mung, pawta rim lahkawn ai lam ni galaw nga ai majaw, dai ginra na mungshawa ni hkrit tsang let sha hkawmsa nga ra ai lam chye lu ai.