Putao kaw Covid-19 ana makawp maga tsi gat
Putao Ginwang Ramma Komiti kaw nna woi awn nhtawm, Covid-19 ana makawp maga ninghkap lu na matu Community Base Facility Quarantine Center jawng ni hta ana makawp tsi gat ai lam hpe May shata praw 4 ya shani kaw nna galaw nga ai lam chye lu ai.
Makawp maga tsi gat ngut sai shara ni gaw Jubili jawng, Ma Ming Jawng hte Zi-un jawng ni hta re. Matut nna Community Base Facility Quarantine Center tawn da ai kaga jawng ni hta mung matut tsi gat ai lam galaw na re hpe chye lu ai.
“Anhte ginra hta gaw Quanrantine masha sha naw nga ai, ana kap ai masha nnga shi ai re majaw tsi gat ai hte ana hpe tau nau makawp maga lu na matu re” nga nna tsi gat ai yaw shada lam hpe Putao buga na Salang langai tsun ai.
Putao Ginwang kata Covid-19 ana hte seng nna tau nau makawp maga ai lam hta Myikyina kaw na garum ningtum hpung ni hte Kachin State Covid-19 Prevention Network kaw nna Mask hte tsi arung arai garum ya ai raitim, nlaw ai majaw yak hkak nga ai lam, masha n gun, hkum kahtet shadang shadawn ai (Thermometer) hte kaga arung arai ( PPE) labu palawng ni mung ra kadawn nga ai lam matut tsun dan ai.
Ya aten hta putao Muklum kata nga ai Community Base Facility Quarantine Center ni kaw daini du hkra rai yang Quarantine masha yawng 93 nga ai rai nna ana kap ai masha nnga shi ai lam chye lu ai.
