Putao Mashang Baw malihka kata kaw mu ai nbung li hpe Manu mare hta labau shang tawn da sa wa na
Putao-Mashang Baw ginwang na Manu mare malihka kata kaw mu ai nbung li dingsa hpe jak rung jak rai ni hte htu shaw la nna, mare kaw labau shang masat masa tawn da na matu hkyen lajang nga ai lam buga masha ni kaw nna chye lu ai.
Ndai nbung li dingsa gaw 1945 ning shawng daw de hkrat ai nbung li rai na re ngu maram lu ai hte ya aten hta nbung li gaw shi a hkum hkrang hkum hkum tsup tsup nrai mat sai lam moi na jiwoi jiwa ni tsun jahpra dan lai wa ai kaw nna maram lu ai nga nna buga masha ni tsun dan ai.
“Hpa mi rai rai daw chyen sha mi rai rai, lit ang ai ni kaw nna shaw ya rai nna ginra langai mi masat da ga, dai kaw tawn da ga, htawm hpang prat na ma ni, ramma ni mung sa yu la lu mu ga, labau shang rai wa u ga ngu yaw shada let ndai nbung li hpe hka-rang de shaw la na hku hkyen nga ga ai” nga nna Manu mare na Salang Maran Gam Awng tsun dan ai.
Mare kata na seng ang ai salang ni hte komiti ni hkrum zup bawngban la nhtawm nbung li hpe hka kata kaw nna hka-rang de shaw la nna, labau shang tawn da lu na matu mung seng ang ai asuya hpang de tang madun sa wa na re.
Ya aten hta myen hpyen dap ni kaw nna hpyen n gun marai 10 jan daram hte nbung li nga ai shara makau kaw dap jung nna, shani shana sin nga ai re.
Hka kata kaw nna nbung li shaw na lam hpe galaw hpang wa ai raitim ndai laman lamu marang grai htu sawng ai re majaw garai nlu shaw ai rai nna lamu marang aten kaja jang she ndai bungli hpe shaw hpang sa wa na re lam ginra masha ni tsun dan ai.
Nbung li hpe gaw October shata nhtoi 11 ya shana daw hkying 2:00pm daram aten hta Salang Hpung Shang Hpung Seng kaw nna shawng ningnan mu ai rai nhtawm jak li kasha gawt let nga sa hkan ai ten hta mu ai re lam chye lu ai.
Nbung li hte seng nna American သံရံုး de shana da ai raitim ya aten du hkra nhtang shana wa ai shiga nnga shi ai re.
Nbung li a galu de pe kade re ai, tsaw de pe kade re ai, kaba de kade daram kaba ai lam hpe gaw hka kata kaw naw re majaw garai nchye lu shi ai re hte hpa baw nbung li re ai hpe mung nchye lu shi ai re.
