Pyi Oo Lwin hte Nawngchu shara manga hta dingdung daw Dap Hpawm AA, TNLA, MNDAA ni shang gasat
Pyin Oo Lwin hte Noung Chu shara manga hta August shata 15 ya jahpawt hkying 5 aten kaw nna minute 30 daram du hkra, dingdung daw Dap Hpawm rai nga ai AA, TNLA hte MNDAA pawng hpawm hpyen hpung ni shang gasat ai re lam, TNLA na tsun ahkang lu Mai Ai Kyaw tsun da ai kaw na chye lu ai.
Shang gasat ai shara ni gaw, Pyin Oo Lwin kaw hpaw tawn ai Myen Hpyen Dap a Machyoi Dakkasu Jawng, Pyin Oo Lwin Muklum Lamkoi, Noung Chu kaw gaw, Lawpan mare, Toll Gate hte Toll Gate mahkrai shara ni hta re.
Myen Hpyen Dap kawn dingdung daw Dap Hpawm ni nga ai shara de hpyen n gun htu ai hpe jahkring ya na matu, ndau laika shapraw da ai raitim, laklai ai lam nnga ai majaw dai hpe ninghkap ai hku nna majan hpe galaw ai re lam, Mai Ai Kyaw tsun da ai kaw na chye lu ai.
