Pyi Tu Tsit ni nga ai shara lahkawng hpe KIA ni sa htim gap gasat
KIA Masat (2) Dap Ba, Masat (14) Dap Dung ginra hta gumshem Myen hpyen dap a lagaw lata tai ai Pyi Tu Tsit ni nga ai shara lahkawng hpe, August shata 11 ya jahpawt manap hkying 3:00am aten kawn hkying 6:00am aten laman KIA ni sa htim gap gasat ai lam chye lu ai.
Tsai Taw ja maw hte Jahtu Zup mare Sanpya Pyi Tu Tsit dap shara lahkawng hpe aten langai hta sha, sa htim gap gasat ai hta Tsai Taw ja maw na shara hpe gasat zing kau lu ai lam nga ai.
Ndai Pyi Tu Tsit ni hpe Min Zin Tant ngu ai wa woi awn ai rai nna, hpyen la langai hpe shata mi lap sen lahkawng jaw ai hta ka-ni lu ai ni hpe, ka-ni mung htuk jaw ai re lam ginra masha ni tsun ai kaw na chye lu ai.
Jahtu Zup Sanpya kaw dap jung shara jahkrat nga ai Pyi Tu Tsit hpyenla n gun 100 daram nga ai rai nna, lai wa lai sa mungshawa ni hpe gumhpraw hpyi sha ai lam, shanhte yu yang ntsen nhten dum ai mungmasha hpe rai jang, adup abyen zing-ri ai lam ni galaw ai nga nna, ginra masha ni tsun dan ai.
Lai wa sai July shata 18 ya shani hta KIA Masat (14) Dap Dung ginra, Kanoi Tu post de Pyi Tu Tsit ni shamu shamawt shang wa ai majaw, gasat gala majan byin sai re hpe mung chye lu ai.
