Quarantine hkamla ngut sai masha marai 16 hpe wa shangun

Sinpraw Ginwang Ginjaw, Mai Ja Yang Muklum hkamja lam jep chyoi dabang kaw April shata 30 ya shani du hkra rai yang, hkamja lam maram masam hkam la ngut sai masha marai 16 hpe wa shangun sai lam chye lu ai.

Quarantine tawn hkrum ai masha ni hpe jahpawt shana body tempreture ding yang jep chyoi ya nga ai, quarantine hkam la ngut sai masha ni hpe mung nta kaw bat mi naw wa nga ra na lam tsun dat ai, ntsen nhten ai machyi masha ni nga wa yang laksan tawn, tsi gawn lajang na matu shara ni hkyen shajin da ai re lam, Sinpraw Ginwang Ginjaw Covid-19 Ana Zinli Makawp Ninghkap Komiti Amu Madu Du Kaba Marip Brang Awng tsun ai.

Quarantine hkam la ai masha ni gaw, Mai Ja Yang Muklum kata na masha ni, IDPs hkan na masha ni hte Nhkawng Pa kaw na mare masha ni re lam, Du Kaba matut tsun ai.

Ya aten hta Mai Ja Yang Muklum kaw quarantine naw hkamla nga ai masha yawng marai 43 rai nna, Laiza Mai Sak Pa hkamja lam jep chyoi dabang kaw quarantine hkam la nga ai masha yawng marai 21 hte Mung Lai Hkyet hkamja lam jep chyoi dabang hta quarantine hkam la nga ai masha marai 4 nga ai lam chye lu ai.