Quarantine tawn da ai jawng shara ni hpe Asuya hpaji dap de bai ap na
Manmaw Ginwang, Man Je Ninghtawn kata kaw nga ai Quarantine jawng shara ni hpe June shata 15 ya shani hta Asuya hpaji dap de bai ap ya na lam chye lu ai.
“July shata praw aten hta lawu tsang jawng ni jawng garai nhpaw shi ai rai tim, lapran tsang jawng hte lahta tsang jawng ni jawng bai hpaw na lam nga ai majaw kaga mungdan kaw na du wa ai mungshawa ni hpe tawn da ai Quarantine shara jawng ni hpe hpaji dap de bai ap ra ai re” nga nna Manje mare na Salang langai tsun dan ai.
Ya aten hta ndai quarantine masha ni hpe Man Je Ninghtawn kata mare lawk shagu hta nga ai hpaji jawng ni hta tawn da ai re. Raitim quarantine jawng shara ni hpe Asuya hpaji dap de bai ap kau ra sai re majaw tinang mare lawk shagu hta shara tam hkyen lajang la ra ai. Dai ni du hkra gaw gara shara hta galaw na ngu hkyen lajang ai lam nnga shi ai re hpe mung, Salang wa matut tsun dan ai.
May shata 15 ya shani du hkra Manje ninghtawn kata hta miwa mungdan hte Yangone myo kaba kawn wa ai quarantine masha yawng 500 jan nga ai re. 300 jan gaw nhtoi 21 ya hpring nna tinang dum nta de wa shangun kau sai rai nna ngam ai 200 jan gaw quatantine naw shang nga ai re.
May shata 13 ya shani, Munghpawm Myen Mungdan Coronavirus Diseaase 2019 (Covid-19) Ninghkap Tsi Gawn Lajang Ginjaw Rung kawn ndau laika shapraw da ai hte maren Manje ninghtawn kata hta mung 14 ya shani hta Covid-19 kap bra ana hpe matut makawp maga lu na matu May shata 15 ya shani du hkra ndau da ai lam hpe May shata 31 ya shani du hkra matut aten masat ndau shana da ai lam chye lu ai.
