Ramma hte mungmasa ningmu jahpaw hkaw tsun hpawng galaw la ngut
Kachin State People Party (KSPP) ramma komiti kaw nna woi awn galaw ai, ramma hte mungmasa ningmu jahpaw hkaw tsun hpawng lamang hpe Myitkyina Muklum Shatapru Manau Wang Majoi Gawknu hta a ngwi a pyaw hte galaw la lu sai lam chye lu ai.
October shata 11 ya shani hta gaw, ramma hte mungmasa ningmu jahpaw ai hkaw tsun hpawng hpe galaw ai rai nna, October shata 12 ya shani hta gaw, Myitkyina gai wang kata na KSPP a ramma komiti hpaw shabawn ai lam hpe galaw ai re.
Myitkyina gai wang kata na KSPP ramma komiti ningbaw magam lit hpe Sara Ah Sa rai nna, amu madu magam lit hpe gaw Shadang Hkahtat Tu Mai yan re. Komiti masha yawng marai 12 re hte ndai komiti ni hku nna Myitkyina gai wang kata na mare kahtawng ni hta KSPP ramma komiti hpe matut hpaw sa wa na re lam chye lu ai.
KSPP ramma komiti hpaw shabawn sa wa ai a yaw shada lam hpe Sara Naw Hkung (KSPP Ramma Magam Dap Lit Hkam) kaw nna ya na zawn tsun ai.
“Dai ni anhte ျမိဳ႕ျပနိုင္ငံေရး de sa wa nga ai, du na 2020 ning ra lata poi hta tsa lam shadang malawng maga dang hkra ngu ai yaw shada da ai lam nga ai. Anhte a Kachin State hpe galai shai na matu nachying kam ai, mungmasa galaw ai hpe myit shangsha ai ramma ni yawng hkra lata gindun ga, ramma langai lahkawng a n gun hte sha, Mungdan lu galai shai lu na nre, anhte yawng hkra myithkrum yang gaw Mungdan hpe lu galai shai na re hpe kam ai. Dai re majaw mungshawa kanu kawa ni, nawku hpung kanu kawa ni hte Htunghkying Hpung ningbaw ni yawng hkra, KSPP ngu ai zup shara de zup nhtawm, anhte a ahkaw ahkang lu ging lu ang ai ni hpe mungmasa ladat hku nna gasat sa wa ga” nga nna tsun ai.
Ramma hte mungmasa ningmu jahpaw hkaw tsun hpawng hta Myitkyina gai wang kata na ramma ni marai 900 daram sa du sharin hkamla ai rai nna KSPP a policy hte maren laga gai wang ni hta mung matut galaw sa wa na re lam chye lu ai.
