Ramma hte mungmasa ningmu jahpaw hkaw tsun hpawng lamang galaw na
Kachin State People’s Party (KSPP) Ramma Komiti kawn woi awn nhtawm, Ramma hte mungmasa ningmu jahpaw hkaw tsun hpawng hte KSPP Waimaw Rammma Komiti hpaw shabawn na lamang hpe January shata 11 ya shani hkying 9:00am kaw nna hkying 4:00pm aten du hkra, Waimaw Chyai Yang Htungking Manau Wang kaw galaw na re lam chye lu ai.
Lamang hta jahpawt daw hta ramma hte mungmasa ningmu jahpaw hkaw tsun hpawng hpe galaw na rai nna, shana daw hta KSPP Waimaw Ramma Komiti hpe hpaw ai lam galaw na re.
“Ya na ramma law malawng gaw mungmasa lam hta shang lawm na matu hkrit ai, mungmasa lam hta ningbaw ningla hku nna tsap nga ai ramma ni lata mai hti ai daram sha naw re majaw, hpang ban na ramma ni na matu grai hkrit tsang hpa re, kanu kawa ni law malawng mung myit nhkawn shi ai, mungmasa hku nna shanhte hpe moi kaw nna, jahkrit shama da ai lam ni a majaw, ya du hkrit tsang taw ai rai nna kasha ni hpe mung mungmasa hte seng nna nmai shang lawm ai zawn re ni ya du hkra naw nga taw ai, ramma ni mung mungmasa lam yan hta tatut ading tawk seng ai, kaja nan mung mungmasa lam hta shang lawm ra ai, mungdan hpe woi awn na ningbaw ningla ni tai wa na ni gaw ramma ni re majaw, ramma ni a matu yaw shada let mungmasa hte seng nna ningmu jahpaw hkaw tsun hpawng galaw ai re” nga nna KSPP a Ramma Komiti Amu Madu Saranum Seng Nu Pan tsun ai.
Hkaw tsun hpawng hta Sara Jan Hkung kaw nna Party hte seng ai lam hpe tsun sang lang dan na re. Sara Kying Sin Wa kaw nna ya na ramma ni a mungmasa lam gara hku rai taw nga ai lam hte seng nna tsun dan mat wa na re hte Saranum Seng Nu Pan hku nna gaw, ya na ramma ni mungmasa hta gara hku shang lawm ra na, ramma ni mungmasa hta shanglawm ai gaw ahkyak ai i? ngu ai lam hte seng nna woi bawngban ai lam ni galaw sa wa na re hpe chye lu ai.
Hpawng lamang hta Waimaw ginra hta shanu nga ai ramma kaji kaba yawng, makam masham amyu bawsang Htunghking n ging hka ai ramma ni yawng shang lawm mai ai re.
KSPP Ramma Komiti kawn woi galaw ai hkaw tsun hpawng hpe ndai lang hte rai yang 6 lang rai sai hte Potao, Sawlaw, Chihpwi, Njang Yang, Machang Baw ginra ni hta mung matut galaw sa wa na masing nga ai lam chye lu ai.
