Ramma hte sut masa hkaw tsun hpawng galaw la lu sai

Jinghpaw Wunpawng Laili Laika hte Htunghking Hpung (JLH) Dakkasu ni Myitkyina kaw nna woi awn galaw ai, “ramma hte sut masa” ningmu jahpaw hkaw tsun hpawng hpe January shata 30-31 ya laman, Myitkyina AKYU Center kaw galaw la lu sai lam chye lu ai.

Hkaw tsun hpawng hta, JLH Dakkasu jawng shagu na ramma ni marai 32 sa du shanglawm ai rai nna, “ramma hte sut masa” ngu ai ga baw kata “sut masa galaw wa ai shaloi arang hpe gara hku hkyen lajang ra na, kaning re ai lam ni hpe tau hkyen shajin ra na hte gara hku kanawn mazum sa ra na ngu ai lam hpe madung tawn let JLH Usa Sut Du Labya Mung Htoi kaw nna hkaw tsun sang lang dan ai lam chye lu ai.

Wunpawng ramma ni sut masa lam hta, gara hku bawngring wa hkra gara hku galaw sa wa ra ai lam ni hpe sharin hkam la let, tatut jai lang hkawm sa lu na matu yaw shada let hkaw tsun hpawng galaw ai lam, JLH Dakkasu ni Myitkyina Amu Madu Tangbau Seng Di Awng tsun ai.

Ramma ni hpe ya na zawn ningmu jahpaw hkaw tsun dan ai lam hpe matut nna galaw sa wa na masing nga ai lam chye lu ai.

Photo Credit; Shadang Seng Di Awng