Ramma ni a sut masa gamung dup hpawng galaw

Jinghpaw Wunpawng Ramma Hpung Zinghkri (Kachin National Youth Network) hte Myitkyina kaw nga ai Ramma wuhpung ni, ta gin dun nna Ramma ni a sut masa gamung dup hpawng lamang hpe Myitkyina Shtapru manau wang Majoi Gawknu kaw, January shata 18 ya shani galaw ai lam chye lu ai.

“Wunpawng ramma hkumding dek, magam bungli galaw sha lu na matu myit nchyan shapraw la lu nna, kaja nan ndai lamang kaw sa shanglawm ai a marang e, tinang a zinghkri ai sut masa galaw sha lu na matu, magam bungli hte seng ai zinghkri shang wang hpe tinang grau kaba hkra lu zinghkri la lu na matu yaw shada ai re” nga nna Saranum Sut Seng Htoi tsun ai.

Laksan lamang hku nna, Kachin Ramma ni a gun rai htuk shapraw ai lam ni hte sut hpaga madun ai lamang ni mung lawm ai re.

Ramma ni a sut masa gamung dup hpawng lamang hpe Wunpawng Ramma ni yawng myit hkrum let, galaw ai hta ndai lang gaw daw 1 rai nna, matut nna mung daw 2, daw 3 hku nna galaw sa wa na masing nga ai re hpe chye lu ai.

Hpawng hta Myitkyina Myo mare kaba hta shanu shingbyi nga ai nawku hpung shagu kaw na ramma ni hte sumtsan kaw na jawng wa lung ai ramma ni sa du shang lawm ai lam chye lu ai.